آمدن سے زائد اثاثہ کیس؛ علیم خان کو مزید 15 روز کے لیے جیل بھجوادیا گیا

رسائی نیوزلاہور:لاہور کی احتساب عدالت کے جج سید نجم الحسن بخاری نے تحریک انصاف کے رہنما علیم خان کے خلاف آمدن سے زائد اثاثہ کیس کی سماعت کی۔ جیل حکام کی جانب سے علیم خان کو سخت سیکیورٹی میں عدالت کے روبرو پیش کیا گیا۔ علیم خان کے وکیل نے موقف اختیار کیا کہ ان کے موکل کئی روز سے گرفتار ہیں لیکن نیب نے اب تک ان کے خلاف ریفرنس دائر نہیں کیا، نیب کے وکیل نے جواب میں کہا کہ ریفرنس تیاری کے مراحل میں ہے۔ مکمل ہوتے ہی ریفرنس دائر کر دیا جائے گا۔ احتساب عدالت نے فریقین کا موقف سننے کے بعد علیم خان کے جوڈیشل ریمانڈ میں 15 دنوں کی توسیع کردی۔ عدالت نے ہدایت کی کہ علیم خان کا جوڈیشل ریمانڈ ختم ہونے پر انہیں 2 اپریل کو عدالت میں پیش کیا جائے۔ یاد رہے کہ علیم خان پر ظاہر کردہ آمدنی سے زائد اثاثے بنانے کا الزام ہے۔

اس خبر پر اپنی رائے کا اظہار کریں